Shu yilning 20-21 dekabr kunlari Qatar poytaxti Doha shahrida joylashgan “Aspetar” sportga ixtisoslashgan tibbiyot markazida milliy chempionatimizda ishtirok etayotgan klublar shifokorlari uchun seminar tashkil etiladi.
Seminar davomida “Aspetar” tibbiyot markazi mutaxassislari tomonidan milliy chempionatimiz klublari shifokorlariga sport tibbiyotida qo‘llanilayotgan yangi vositalar, davolash uslublari, futbolchilarning sog‘lig‘ini nazorat qilib borishda ahamiyat berish kerak bo‘lgan muhim jihatlar haqida batafsil ma’lumot beriladi.
Ushbu seminar shu yilning 17 oktyabr kuni O‘FF Prezidenti Umid Ahmadjonov va Qatar Futbol Uyushmasining Prezidenti Shayx Hamad bin Xalifa Ahmad at-Taniy o‘rtasida imzolangan memorandum asosida tashkil etilayotganini ham alohida ta’kidlash kerak.
Qatarga tashrif davomida Umid Ahmadjonov “Aspetar” sportga ixtisoslashgan tibbiyot markazida bo‘lib, markaz faoliyati bilan yaqindan tanishgan hamda ushbu markazning O‘zbekiston futboli uchun foydali jihatlarini yaqindan o‘rgangan edi.