Kecha, 10 dekabr kuni Ispaniya chempionatining 15-turida “Barselona” hujumchisi Lionel Messi “Vilyarreal”ga qarshi uchrashuvning 82 daqiqasida gol urdi.

Gap shundaki, ushbu gol Lionel Messi uchun “Barselona” safida barcha musobaqalar doirasida urilgan 525-gol sifatida qayd etildi.

Messi ushbu natija evaziga “Bavariya” jamoasining sobiq futbolchisi Gerd Myuller tomonidan bir klub safida urilgan gollar bo‘yicha o‘rnatilgan rekordni takrorladi.

Ma’lumot o‘rnida, argentinalik futbolchisi “Barselona” safida 2004 yildan buyon to‘p surib kelmoqda.

Gerd Myuller esa “Bavariya” sharafini 1964 yildan 1979 yilga qadar himoya qilgan.

Ta’kidlab o‘tish joiz, Lionel Messi joriy mavsum Ispaniya chempionatida 15 uchrashuvda maydonga tushib, 14 ta gol urdi.

Eslatib o‘tamiz, 25 noyabr kuni futbolchi va “Barselona” klubi o‘rtasidagi o‘zaro kelishuv 2021 yilning yoziga qadar uzaytirilgandi.