O‘zbekiston Futbol Federasiyasi yurtimizda futbolni ommalashtirish, bolalar futbolini rivojlantirish, terma jamoalarimizga munosib nomzodlarni yetkazib berish maqsadida turli chora-tadbirlarni amalga oshirmoqda.
Mamlakatimizdagi iste’dodli bolalarni saralab olib, ularni futbol bilan muntazam shug‘ullanishlarini ta’minlash, yosh futbolchilarning saviyasini o‘stirib borish, yangi iste’dodlarni kashf qilish maqsadida, O‘zbekiston Futbol Federasiyasi qoshida bepul iste’dodli bolalar futbol guruhlari tashkil etiladi.
Bu maktabga iste’dodli bolalar saralab olinib, O‘FF tomonidan ishga jalb qilingan malakali murabbiylar tomonidan futbol sir-asrorlari o‘rgatib boriladi. Har bir chiziqda harakat qiluvchi futbolchilar bilan alohida murabbiylar ish olib borishini ham alohida ta’kidlab o‘tish zarur. Masalan, darvozabonlar murabbiyi yosh futbolchilar bilan alohida mashqlar olib borsa, hujumchilar murabbiyi esa yosh futbolchilarda tezkorlik, kuchli zarba yo‘llash, to‘purarlik kabi xususiyatlarni shakllantirib borishadi.
Ushbu guruh a’zolari nazariy va amaliy mashg‘ulotlar o‘tkazishi va o‘z mahoratlarini sayqallab borishi uchun barcha shart-sharoitlar yaratiladi.
