Shu yilning 18 dekabr kuni bolalar futboli bo‘yicha serbiyalik mutaxassis Zavisha Milosavlevich yurtimizga tashrif buyurgani haqida avval xabar berib o‘tgandik.

Kecha serbiyalik mutaxassis Andijonda bolalarning futbol bilan shug‘ullanishi uchun yaratilgan shart-sharoitlar bilan yaqindan tanishib, bolalar futboli bo‘yicha ish olib borayotgan murabbiylarga o‘z dasturini taqdim etganini ma’lum qilgandik.

Bugun Zavisha Milosavlevich Farg‘onaga tashrif buyurdi. U Farg‘ona viloyati futbol federasiyasi vise-prezidenti Hakim Fayziyev bilan uchrashdi. Keyin "Istiqlol" stadioni bilan yaqindan tanishdi. Shundan so‘ng "Neftchi" qoshidagi bolalar futbol maktabiga borib, ushbu maktabda futbol sir-asrorlarini o‘rganayotgan bolalar bilan suhbatlashdi. Farg‘ona viloyati Olimpiya zaxiralari kollejida bolalar murabbiylari uchun o‘z dasturini taqdimotini o‘tkazdi. Murabbiylarga kerakli maslahatlar berdi.

Bundan tashqari, shu kunlarda Farg‘onada "S" lisenziyasi uchun bo‘lib o‘tayotgan o‘quv kurslarida ishtirok etdi. O‘quv kurslarini o‘tkazayotgan Zoir Hasanov bilan fikr almashib, o‘z tajribalari bilan o‘rtoqlashdi.

Zavisha Milosavlevich bugunning o‘zida Qo‘qon shahriga yo‘l oldi. U yerda ham bolalar futboli bo‘yicha ish olib borayotgan mutaxassislar bilan uchrashuvlar rejalashtirilgan.