Шу йилнинг 18 декабрь куни болалар футболи бўйича сербиялик мутахассис Завиша Милосавлевич юртимизга ташриф буюргани ҳақида аввал хабар бериб ўтгандик.
Кеча сербиялик мутахассис Андижонда болаларнинг футбол билан шуғулланиши учун яратилган шарт-шароитлар билан яқиндан танишиб, болалар футболи бўйича иш олиб бораётган мураббийларга ўз дастурини тақдим этганини маълум қилгандик.
Бугун Завиша Милосавлевич Фарғонага ташриф буюрди. У Фарғона вилояти футбол федерацияси вице-президенти Ҳаким Файзиев билан учрашди. Кейин "Истиқлол" стадиони билан яқиндан танишди. Шундан сўнг "Нефтчи" қошидаги болалар футбол мактабига бориб, ушбу мактабда футбол сир-асрорларини ўрганаётган болалар билан суҳбатлашди. Фарғона вилояти Олимпия захиралари коллежида болалар мураббийлари учун ўз дастурини тақдимотини ўтказди. Мураббийларга керакли маслаҳатлар берди.
Бундан ташқари, шу кунларда Фарғонада "С" лицензияси учун бўлиб ўтаётган ўқув курсларида иштирок этди. Ўқув курсларини ўтказаётган Зоир Ҳасанов билан фикр алмашиб, ўз тажрибалари билан ўртоқлашди.
Завиша Милосавлевич бугуннинг ўзида Қўқон шаҳрига йўл олди. У ерда ҳам болалар футболи бўйича иш олиб бораётган мутахассислар билан учрашувлар режалаштирилган.
