Farg‘onaning “Neftchi” jamoasi 2018-yilgi mavsumga tayyorgarlikni boshladi. Sergey Lebedev hamda Murod Ismoilov boshchilik qilayotgan mashg‘ulotlar Qirgulidagi stadionda o‘tkazilmoqda.

Tarkibdagi o‘zgarishlarga to‘xtaladigan bo‘lsak, klub bilan shartnomasi nihoyasiga yetgan bir qator futbolchilar boshqa jamoalar ko‘rigiga yo‘l olishdi. Amalda shartnomasi mavjud bo‘lgan o‘yinchilar esa jamoa mashg‘ulotlarida ishtirok etishyapti.

Aytish kerakki, so‘nggi paytlarda matbuotda “Neftchi” klubi haqida turli-xil asossiz yangiliklar tarqamoqda. “Neftchi” PFK muxlislardan bu kabi mish-mishlarga e’tibor bermasligini so‘raydi.

Haqiqatdan ham yangi mavsumda “Neftchi” klubini aynan qaysi ligada o‘ynashi mavhumligicha qolmoqda.

Klub O‘zPFLning 2018-yilgi mavsumiy talablarini bajarish, ya’ni lisenziyalash jarayonidan o‘tmoqda.Tez orada mazkur masala ham o‘z yechimini topadi.

Shuningdek, tez kunlarda Farg‘onaga O‘FF prezidenti Umid Ahmadjonovning tashrifi kutilmoqda.

Tashrif davomida Farg‘ona viloyatidagi umumiy ahvol o‘rganilgach, tegishli xulosalar qilinadi. Jamoamizga doir so‘nggi yangiliklarni klub rasmiy sayti orqali kuzatib boring.

“Neftchi” matbuot xizmati