“Liverpul” ustozi Yurgen Kloppning aytishicha, Germaniyada ishlab yurgan paytida unga “Manchester Yunayted”dan taklif tushgan ekan.
“Manchester Siti”ga qarshi o‘yindan oldin Klopp 2014 yilgi voqealarni esladi. O‘shanda u “Borussiya”ni boshqarar, “Manchester Yunayted”da esa Devid Moyes ishlardi. “Qizil iblislar” Moyesning o‘rniga Kloppni olib kelmoqchi bo‘lishgan, ammo Klopp rad etgach, “Manchester Yunayted”ga Lui Van Gal taklif qilingan.
“Ha, “Manchester Yunayted” menga qiziqqandi. Biroq bu klubning taklifini eshitganimda hech narsani his qilmadim va rad etdim, bu men uchun to‘g‘ri yo‘l edi. Ko‘plab jamoalar taklif bilan chiqishgandi, ammo hammasiga bir xil javob qaytardim: “Iloji yo‘q, men dam olmoqchiman”. Biroq “Liverpul”ning taklifiga yo‘q deya olmasdim. Garchi dam olish borasidagi rejam o‘zgarmagan bo‘lsa-da, “Liverpul”ning taklifini eshitgan zahotim ishga kirishdim”, dedi Klopp.
