“Ливерпул” устози Юрген Клоппнинг айтишича, Германияда ишлаб юрган пайтида унга “Манчестер Юнайтед”дан таклиф тушган экан.

“Манчестер Сити”га қарши ўйиндан олдин Клопп 2014 йилги воқеаларни эслади. Ўшанда у “Боруссия”ни бошқарар, “Манчестер Юнайтед”да эса Девид Мойес ишларди. “Қизил иблислар” Моеснинг ўрнига Клоппни олиб келмоқчи бўлишган, аммо Клопп рад этгач, “Манчестер Юнайтед”га Луи Ван Гал таклиф қилинган.

“Ҳа, “Манчестер Юнайтед” менга қизиққанди. Бироқ бу клубнинг таклифини эшитганимда ҳеч нарсани ҳис қилмадим ва рад этдим, бу мен учун тўғри йўл эди. Кўплаб жамоалар таклиф билан чиқишганди, аммо ҳаммасига бир хил жавоб қайтардим: “Иложи йўқ, мен дам олмоқчиман”. Бироқ “Ливерпул”нинг таклифига йўқ дея олмасдим. Гарчи дам олиш борасидаги режам ўзгармаган бўлса-да, “Ливерпул”нинг таклифини эшитган заҳотим ишга киришдим”, деди Клопп.