ЖЧ–2026га тайёргарлик доирасида ўтказилган ўртоқлик учрашувида Португалия ва Чили миллий терма жамоалари ўзаро баҳс олиб борди. Португалиядаги «Эштадиу Насьонал ду Жамор» стадионида кечган учрашувда майдон эгалари 2:1 ҳисобида ғалаба қозонди.

Ҳисоб 58-дақиқада очилди. Португалия ҳужумчиси Гонсалу Гедеш жамоасини олдинга олиб чиқди. 75-дақиқада ярим ҳимоячи Бруну Фернандеш устунликни мустаҳкамлади. Чилиликлар эса 90+2-дақиқада Лукас Сепеда томонидан киритилган гол эвазига ҳисобни қисқартиришга муваффақ бўлди.

Учрашувнинг энг баҳсли вазияти биринчи бўлимга қўшиб берилган вақтда юз берди. Ён чизиқ яқинидаги тўқнашувдан кейин Португалия ҳужумчиси Рафаэл Леау ва Чили ҳимоячиси Иван Роман ўртасида жанжал келиб чиқди. Натижада ҳар икки футболчи ҳам тўғридан-тўғри қизил карточка олиб, майдонни тарк этди.

Қайд этилишича, Леау рақибининг бўйнидан ушлаб, унинг юзига зарба берган.

Португалия терма жамоаси сардори Криштиану Роналду учрашувни асосий таркибда бошлади ва биринчи бўлимни тўлиқ ўтказди. Бироқ у самарали ҳаракатлари билан ажралиб тура олмади.

Эслатиб ўтамиз, ЖЧ–2026 гуруҳ босқичида Португалия К гуруҳидан ўрин олган бўлиб, Конго ДР, Ўзбекистон ва Колумбия терма жамоаларига қарши майдонга тушади.

Чили терма жамоаси эса Жаҳон чемпионати саралашининг Жанубий Америка минтақасида 10 жамоа орасида 10-ўринни эгаллаб, мундиал йўлланмасидан қуруқ қолган эди.