Аргентина терма жамоаси 2026 йилги Жаҳон чемпионати бошланиши арафасида таркибий йўқотишга учради.

Миллий жамоанинг расмий саҳифаларида маълум қилинишича, ҳимоячи Леонардо Балерди жароҳат сабабли мундиалда иштирок эта олмайди.

— Леонардо Балерди ўнг оёғининг камбаласимон мушагидан жароҳат олди ва шу сабабли Жаҳон чемпионати қайдномасига киритилмайди. Тезроқ соғайиб кетишингни тилаймиз! — дейилади Аргентина терма жамоаси баёнотида.

26 ёшли футболчи амалдаги жаҳон чемпионлари ҳимоя чизиғини кучайтириш вариантларидан бири сифатида кўрилаётган эди, аммо энди у тўрт йилликнинг энг нуфузли мусобақасини ўтказиб юборади.

Эслатиб ўтамиз, Аргентина терма жамоаси 2022 йил Қатарда бўлиб ўтган Жаҳон чемпионати ғолиби ҳисобланади. «Албиселесте» ўз тарихида уч марта — 1978, 1986 ва 2022 йилларда жаҳон чемпиони бўлган.

ЖЧ-2026да аргентиналиклар J гуруҳида иштирок этади. Улар Жазоир, Австрия ва Иордания терма жамоаларига қарши баҳс олиб боради.

Жамоа сардори Лионель Месси якуний қайдномадан жой олган. Агар у майдонга тушса, футбол тарихида олти марта Жаҳон чемпионатида иштирок этган илк футболчига айланади.