O‘FF prezidenti Umid Ahmadjonov Yaponiyaga qarshi chorak final o‘yini oldidan O‘zbekiston OTJ futbolchilariga quyidagi murojaatnomani yubordi:

"Hurmatli futbolchilar va murabbiylar!

Kecha 52 kishini o‘z bag‘riga olgan avtobusda Rossiyaga yo‘l olgan fuqarolarimiz dahshatli tarzda halok buldilar. Buni bilgan bo‘lishingiz kerak. Ayni paytda O‘zbekistondagi barcha insonlar vafot etganlar xotirasiga duolar qilayapti.

Sizlarga shuni aytamanki, bugun g‘alaba qozonib, alamda qolgan o‘zbek xalqiga quvonch ulashing. Qarang, Sizni egningiz but, qorningiz to‘q. Barcha sharoitlar yaratilgan. Lekin taqdir ekan, ko‘plab vatandoshlarimiz halokatga duchor bo‘ldilar. Shuning uchun xam siz o‘zingizdagi sharoitga doim shukrli bo‘ling.

Avvalgi uch o‘yiningizni ko‘rdim. Qiynaldinglar, o‘yinda mazmun yo‘qdek. Qani ketishdan oldin men maqtagan yigitlar? Bugun barchani nigohi sizlarga qaratiladi. Xalkni xursand qilishga bugun hammadan ham sizlarda imkoniyat ko‘p. Kechagi kundagi ko‘ngil g‘ashligiga birgina g‘alaba bilan taskin berish imkoniyati bugun sizlarda mavjud.

O‘sha avtobusda ketayotganlar ichida, aniq ishonamanki, o‘zbek futboliga befarq bo‘lmaganlari ham ancha bor edi. O‘shalar hurmati bugun g‘alaba qozoning, iltimos sizlardan!

Umid Ahmadjonov, O‘FF prezidenti".