Poytaxtning “Yoshlik” sport majmuasida ayollar futzali bo‘yicha mamlakat chempionati davom etayotganligi haqida ma’lumot berganmiz. Bugun chempionat birinchi davrasining ikkinchi tur o‘yinlari bo‘lib o‘tdi.

Kechagi bahslarda raqiblarini yirik hisoblarda mag‘lub etgan “Sevinch” va “Metallurg” jamoasi har doimgidek bu yilgi chempionatda ham bosh sovringa asosiy da’vogar ekanliklarini isbotlashgandi. “Lokomotiv”ning birinchi turda dam olganidan kelib chiqib, uchinchi o‘ringa da’vogarlik qiladigan jamoa nomini bashorat qilish qiyin edi.

Bugun “Lokomotiv” “Metallurg” bilan kuch sinashdi. Bekobodliklar harchand urinishmasin, birinchi bo‘limning so‘nggi daqiqasigacha raqib darvozasini ishg‘ol qila olishmadi. “Temiryo‘lchilar” garchi raqibalariga nisbatan texnik va taktik jihatdan farq qilsalarda, g‘alabaga bo‘lgan shijoati tufayli chiroyli o‘yin namoyish etishdi. Yakunda baribir tajriba o‘z so‘zini aytdi – “Metallurg” g‘alaba qozondi. “Lokomotiv” qizlari bu o‘yinlari bilan bronza medalga da’vogarlik qilishlari mumkinligini isbotlashgandek bo‘lishdi.

Ikkinchi o‘yinda “Sevinch” AGMK jamoasini ayab o‘tirmadi. Olmaliqliklar yirik hisobdagi mag‘lubiyatdan u qadar fojea yasashmayapti, sababi ularning maqsadlari bugun shakllanish, ertaga esa munosib raqobatlashish.   

16 fevral

“Lokomotiv” – “Metallurg” – 1:6

AGMK – “Sevinch” – 1:22

“Paxtakor” jamoasi dam oldi.