Yangi mavsum – Superliga bahslari boshlanishiga bir haftadan salgina zyoiroq vaqt qolayotganda Bekobodning “Metallurg” jamoasi birinchilardan bo‘lib PFL “buyurtma”dan o‘tdi. 2018 yilgi mamlakat chempionatida bekobodliklar safini jami 43 nafar futbolchi himoya etishi rasmiylashdi.

Albatta, “zayavka”dan o‘tgan futbolchilarning barchasi hali uzil-kesil chempionatda qatnashishga tayyor degani emas. Hujjatlarni rasmiylashtirishda ba’zi juz’iy kamchiliklar mavjud. Jumladan, ayrim futbolchilarga sobiq jamoalaridan “otkrepleniya” kerak, ya’ni bu futbolchining “Metallurg”da to‘p surishiga qarshiligimiz yo‘q degan, qaysidir futbolchining tibbiy ko‘riknomasida yetishmovchiliklari bor. yana kimlardir o‘tgan mavsumdagi jarohati bois yangi mavsumga to‘liq tayyor emas. Qolaversa, O‘FA test natijalari bo‘yicha xulosalarini ham hali taqdim etmadi. Shu ma’noda mavsumga jamoa yuz foiz tayyor deyish fikridan yiroqmiz.

Biroq, hozirdan shu narsani muxlislarimizga aniq yetkazmoqchimizki, jamoa tarkibi sakson-sakson besh foizga yangilandi. Taniqli futbolchilardan Javohir Sohibov, Zabixillo O‘rinboyev, Sherzod Fayziyev, Abbos Otaxonov, Saidjamol Davlatjonov, Shahzod Shaymanov, Pavel Smolyachenko singari o‘nlab yangi nomlarni “Metallurg” safida ko‘rasiz. Tez orada O‘FF texnik boshqarmasi xulosalaridan so‘ng biz yakuniy tarkibni e’tiboringizga havola etamiz.

Mavsum tadorigi esa Qibray o‘quv-mashg‘ulot maskanida davom etmoqda. Mashg‘ulotlar bilan bir qatorda o‘rtoqlik o‘yinlariga ham katta e’tibor qaratilyapti. Jamoamiz oxirgi nazorat uchrashuvlarini “Qizilqum” (2:2), “Neftchi” (0:1) va “So‘g‘diyona” (1:1) klublari bilan o‘tkazishdi. Bu haftada esa “Lokomotiv” BFK, “Mash’al” jamoalari bilan ko‘rik o‘yinlari turibdi.

Chempionatni esa “Metallurg” 2 mart sanasida o‘z maydonida “Navbahor” jamoasiga qarshi uchrashuv bilan boshlaydi.