Ukraina milliy antidoping markazi «Shaxtyor» himoyachisi Dario Srnani dopingga qarshi qoidalarni buzgani uchun 17 oyga katta sportdan chetlashtirdi. Bu haqda tashkilot saytida xabar berilgan.
Ta’kidlanishicha, milliy antidoping markazi doping namunada chiqqan ijobiy natijada o‘yinchining katta aybi bor, deya hisoblamagan. Srnaning tan olishicha, antidoping qoidalarini atayin buzmagan. Milliy antidoping markazi o‘yinchi tushuntirishlarini hisobga oldi, shuningdek, u ijobiy doping namuna haqida xabarlar paydo bo‘lganidan so‘ng o‘z klubi uchun maydonga tushishdan ko‘ngilli ravishda voz kechgani e’tiborga olindi. Himoyachi sentyabr oyida «Shaxtyor» uchun maydonga tushishdan voz kechgandi.
Srnaning chetlashtirish muddati 2017 yilning 22 martidan hisoblanadi. 35 yoshli xorvatiyalik futbolchi 2018 yilning 22 avgustidan avval maydonga tusha olmaydi.
