27-28 fevral kunlari Sochida JCH-2018 ishtirokchi jamoalari vakillari uchun tashkillashtirilgan seminarda Eron milliy termasi bosh murabbiyi Karlush Keyrush ham qatnashdi.
Marosim yakunida FIFA.com sayti ijodkorlari portugaliyalik mutaxassisni bezovta qilib, maxsus intervyu olishdi.
Bilasiz, forslar aynan portugaliyalik murabbiy boshqaruvida qatorasiga ikkinchi marta mundial yo‘llanmasini qo‘lga kiritishdi.
Aytish joiz, Eron futboli tarixida bunday muvaffaqiyat ilk marta kuzatildi.
- Eron milliy jamoasi 4 yilcha oldin sizning boshqaruvingizda JCH-2014 final bosqichida maydonga tushgandi. Eng muhimi, forslarni 8 yillik tanaffusdan so‘ng yana mundial sari boshlagan edingiz.
Mana, jamoangiz navbatdagi JCH saralashini yanada muvaffaqiyatli o‘tkazib, Osiyoda birinchi bo‘lib yo‘llanmani qo‘lga kiritdi. Xo‘sh, Eron termasi oldiga qanday vazifalar qo‘yilmoqda, bosim yo‘qmi?
- Hozir jamoa qudrati sezilarli darajada oshgani aniq. Braziliyada olingan bebaho tajriba, bir qator o‘yinchilarning Yevropada to‘p surishayotgani evaziga jamoada barqarorlik qaror topdi, raqobat kuchaydi.
Ta’kidlash joizki, bu safar saralash bosqichini mag‘lubiyatsiz yakunladik, darvozamizdan atigi 2 marta to‘p o‘tkazib yubordik. FIFA reytingi bo‘yicha Osiyoning eng kuchli jamoasi bo‘lib turibmiz.
To‘g‘ri, qit’a miqyosidagi o‘yinlar va xalqaro uchrashuvlar o‘rtasida katta farq bor. Lekin jamoamizda uyushqoqlik oshganligiga shubha yo‘q. Xullas, Rossiya mundialida muayyan aniq maqsadni ko‘zlaymiz.
- Ya’ni...
- Avvalo, «pley-off» bosqichiga chiqishimiz kerak. Ha, guruh raundida g‘oliblikka asosiy da’vogarlardan sanalgan Ispaniya va Portugaliya termalariga qarshi maydonga tushamiz.
Shunday bo‘lsada, o‘z imkoniyatlarimizdan balandroq sakrashga urinamiz. Taraqqiyot uchun navbatdagi qadamni tashlash shuni talab qiladi. Bu qadam nafaqat JCH, balki keyingi qit’a musobaqalari va kelgusi saralash kampaniyasi uchun ham juda muhim.
- «Portugaliya futboliga qarshi turish» iborasidan xijolat chekmayapsizmi?
- Yo‘q, «Ispanlarga qarshi to‘p surish, portugallar bilan bellashish» qabilida gapirishni xush ko‘raman (kuladi). Ha, Portugaliya farzandiman. Ammo guruhdagi vaziyatga salmoqli ta’sir etadigan bu bahs shogirdlarim kabi men uchun ham muhim ahamiyatga ega.
O‘sha «duel», shuningdek, Ispaniya va Marokash termalariga qarshi kechadigan uchrashuvlarni katta qiziqish, sabrsizlik bilan kutyapman. O‘ylaymanki, guruhimiz doirasidagi har bir o‘yin qiziqarli tus oladi.
- Krishtianu Ronaldu o‘yinlarini uni zararsizlantirish yo‘lini topishi shart bo‘lgan murabbiyi sifatida kuzatish qanday ekan?
- Albatta, tarkibida shunday kuchli o‘yinchisi bor jamoaga qarshi to‘p surish oson emas. Axir gap dunyoning eng kuchli futbolchisi haqida ketmoqda.
Biroq hakamning start hushtagi chalinishi bilan barcha o‘y-xayollar ikkinchi darajaga o‘tadi. Maydonda qaysi jamoa ishonchliroq harakatlanib, yuqori saviyani ko‘rsatsa, g‘alaba unga nasib etadi. Futbolning oddiy haqiqati shu.
- Umuman, vaqtida Ronaldu bilan birga ishlagansiz. O‘sha davr taassurotlari nechog‘li yorqin?
- Bunday hamkorlikni unutib bo‘lmasligi o‘z-o‘zidan ma’lum. Ayniqsa, «MYU» klubi va Portugaliya terma jamoasidagi faoliyatim hamon ko‘z o‘ngimda. Lekin oradan ancha yillar o‘tdi.
JAR mundiali ham o‘tmishda qoldi. Shu tariqa faoliyatimda men uchun bosh-qa Ronaldular paydo bo‘lishdi. Bunda Alirizo Jahonbaxsh, Rizo Gujannajot va Ali Karimi kabi shogirdlarimni nazarda tutyapman.
Oldimizga qo‘yilgan rejalarni ro‘yobga chiqarish uchun bor e’tiborimni shu yigitlarga qaratishim, tinmay ishlashim kerak.
- Buyuk futbolchilar mavzusini davom ettiramiz. Braziliyada jamoangiz Lionel Messini qo‘riqlashga jiddiy e’tibor qaratgan bo‘lsada, uni butunlay zararsizlantirishni uddalay olmagandi...
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
