O‘zbekiston futbol Assosiasiyasining taqvim rejasiga asosan Samarqand viloyatida 12 yoshli qizlar o‘rtasida futzal bo‘yicha Respublika birinchiligi bo‘lib o‘tdi.

Musobaqa qonun-qoidasiga ko‘ra, uning birinchi bosqichi tuman va shaharlarda o‘tishi, g‘oliblardan tuzilgan viloyat terma jamoalari Samarqandda o‘tadigan final bosqichiga yo‘llanma olishi lozim edi. Ma’lum bo‘lishicha, O‘FA taqvimida belgilangan musobaqa bor-yo‘g‘i Andijon, Samarqand va Navoiy viloyatlarida tashkil etilgan, mazkur viloyatlar terma jamoalari esa belgilangan muddatda Samarqandga yetib kelgan. Ammo boshqa hududlar bo‘yicha vakillar final bosqichida ko‘rinish berishmadi.

Samarqand shahrining “Futzal” sport majmuasida o‘tkazilgan va uch jamoa o‘rtasida kechgan bahslarda Andijon (4:3) hamda Navoiy (2:0) viloyatlari termasi ustidan ustunlikka erishgan maydon egalari birinchi bor o‘tkazilgan mazkur musobaqaning g‘olibi bo‘ldi. Andijon va Navoiy viloyatlari terma jamoalari o‘rtasidagi bahsda esa durang qayd etildi (3:3) va to‘plar nisbatiga ko‘ra andijonliklar ikkinchi o‘rinni egallashdi. Turgan gapki, mag‘lub uchinchi jamoa kichik bronza medali bilan taqdirlandi.

Respublika musobaqasining 14 yoshlilar (2004-2005 yillarda tug‘ilgan qizlar) o‘rtasidagi bahslar 22-27 mart kunlari Qarshi shahrining “Geolog”, 16 yoshlilar (2002-2003 yillarda tug‘ilgan qizlar) o‘rtasidagi o‘yinlar esa 26-31 mart kunlari poytaxtdagi “Yoshlik” sport majmuasida o‘tkazilishi rejalashtirilgan.