Xabar qilinganidek, 16 fevral kuni O‘zbekiston Respublikasi Prezidenti “Futbolni yanada rivojlantirish chora-tadbirlari to‘g‘risida”gi farmonni imzoladi.
Farmon bilan 2018 – 2022 yillarda O‘zbekiston Respublikasida futbolni yanada rivojlantirish dasturi tasdiqlandi.
Shuningdek, O‘zbekiston Respublikasi Jismoniy tarbiya va sport vazirligi, O‘zbekiston Milliy olimpiya qo‘mitasi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari O‘zbekiston futbol assosiasiyasi va boshqa manfaatdor idoralar bilan birgalikda bir oy muddatda futbol bo‘yicha davlat ixtisoslashtirilgan maktab-internatlari faoliyatini tanqidiy o‘rganish vazifasi qo‘yildi.
Mazkur o‘rganish natijalari asosida davlat ixtisoslashtirilgan maktab-internatlari tugatilib, ularning o‘rnida 14 ta hududiy bolalar va o‘smirlar futbol akademiyasi va O‘zbekiston futbol assosiasiyasi huzurida Respublika bolalar va o‘smirlar futbol akademiyasi tashkil qilinadi.