Toshkentning “Lokomotiv” klubi navbatdagi uchrashuvini Superliga 4-tur o‘yinlari doirasida Olmaliqda AGMKga qarshi o‘tkazadi. 

Hozirda “temiryo‘lchilar” jamoasi mazkur uchrashuvga tayyorgarlik jarayonini davom ettirmoqda.  “Lokomotiv”ning yangi a’zolaridan biri Nivaldo Rodriges Ferreyra klub rasmiy saytiga o‘yinoldi tayyorgarlik jarayoni qanday ketayotgani xususida gapirib berdi:

– “Lokomotiv” jamoasi safidagi ilk uchrashuvimda mushagimni jarohatlab oldim va bir nechta o‘yinni o‘tkazib yuborishga majbur bo‘ldim.  Lekin ayni paytda yaxshi holatdaman va oldindagi uchrashuvga butun jamoa bilan jiddiy hozirlik olib boryapmiz.  Raqib o‘yinini tahlil qilib chiqdik.  AGMK – mahoratli futbolchilarga ega jamoa.  Bizni oson o‘yin kutmayotgani tayin.  Lekin “Lokomotiv” ushbu uchrashuvda faqat va faqat g‘alabani ko‘zlab maydonga chiqadi.  Men ham jamoamning g‘alabasiga o‘z ulushimni qo‘shishga urinaman, – dedi tajribali futbolchi.  

Ta’kidlab o‘tamiz, AGMK – “Lokomotiv” uchrashuvi 31 mart kuni Olmaliq shahrida o‘tkaziladi.  O‘yinning boshlanish vaqti – 18:00.