Angliya premer-ligasidagi «Lester» yoshlar jamoasida to‘p suradigan dunyoning eng boy futbolchisi, Bruney sultonining jiyani Faik Bolkiax bilan tanishing.

U Angliya premer-ligasidagi «Lester» yoshlar jamoasida to‘p suradi. Bruney sultonining jiyani hisoblangan futbolchining boyligi taxminan 20 milliard dollarga baholanmoqda.

Faik Los-Anjelesda tug‘ilgan. O‘z yurti Bruney terma jamoasining sardori hisoblanadi. Faoliyatini Angliyaning kamtargina «AFK Nyuberi» jamoasida boshlagan yigitcha 2009 yilda «Sauthempton»ga ko‘chib o‘tgan.

2013 yilda «Arsenal»da ko‘rikdan o‘tgan Faik bir yildan so‘ng Londonning boshqa bir klubi «Chelsi» bilan 2 yillik kelishuvga erishdi.

2016 yilda londonliklar bilan aloqani uzgan Bolkiax «Lester» jamoasiga qo‘shildi va 3 yillik shartnomaga imzo chekdi.

Yigitcha o‘zining boyligi haqida ko‘p ham og‘iz ochmaydi. Uning boyligini otasining boyligiga qarab bilsa bo‘ladi. Ma’lumotlarga ko‘ra 2300 ta xususiy avtomashinaga ega «boy ota»ning garajida qimmatbaho «Bentli», «Ferrari» va «Rolls-Roys»lar talaygina.

«Men aqlimni taniganimdan buyon futbol o‘ynayman. Yoshligimdan to‘p bilan muomala qilish yoqadi. Ota-onam futbolchi bo‘lish haqidagi orzumga yetishishimda katta yordam berishgan», — deydi u.

«Ular kichkinaligimdan ruhiy va jismoniy tarafdan o‘sishim uchun mashq qildirishgan. Ularga havas qilaman», — deydi milliarder futbolchi.