«Al Vahda» – «Lokomotiv» uchrashuvining eng yaxshi futbolchisi deb «temiryo‘lchilar» jamoasining mohir yarim himoyachisi Sardor Mirzayev topildi. Tajribali futbolchi o‘yindan so‘ng o‘z taassurotlari bilan o‘rtoqlashdi:
- Uchrashuvda yirik hisobda g‘alaba qozongan bo‘lsakda, bugungi o‘yin oson o‘tgani yo‘q. Shukrki, ishqibozlarimiz ishonchini oqlay oldik va juda muhim g‘alabani qo‘lga kiritdik. Bugungi o‘yinni yutishimiz shart edi va shunga monand ravishda hozirlik ko‘rgandik. Raqib o‘yinini yaxshilab o‘rgandik, o‘zimizning oldingi uchrashuvlarda yo‘l qo‘ygan xatolarimizni tahlil qildik. Endi esa bizni oldindan «Zob Ahan» bilan juda jiddiy o‘yin kutmoqda. Aynan mana shu uchrashuvda nimchorak final yo‘llanmasi hal bo‘ladi.
Bugun 2ta gol urdim. Jarimadan gol urgan paytim aslida to‘pni sheriklarimga oshirib bermoqchi edim. To‘p esa darvozaga borib tushdi. Buni so‘nggi paytlarda bizga yetishmayotgan omad bilan bog‘lagan bo‘lardim. Eng muhimi – jamoamiz g‘alaba qozondi. Men mana shundan juda xursandman. Umid qilamanki, kelgusi uchrashuvlarda ham g‘alaba biz tomonda bo‘ladi, - dedi Sardor Mirzayev.
