«Ал Ваҳда» – «Локомотив» учрашувининг энг яхши футболчиси деб «темирйўлчилар» жамоасининг моҳир ярим ҳимоячиси Сардор Мирзаев топилди. Тажрибали футболчи ўйиндан сўнг ўз таассуротлари билан ўртоқлашди:

- Учрашувда йирик ҳисобда ғалаба қозонган бўлсакда, бугунги ўйин осон ўтгани йўқ. Шукрки, ишқибозларимиз ишончини оқлай олдик ва жуда муҳим ғалабани қўлга киритдик. Бугунги ўйинни ютишимиз шарт эди ва шунга монанд равишда ҳозирлик кўргандик. Рақиб ўйинини яхшилаб ўргандик, ўзимизнинг олдинги учрашувларда йўл қўйган хатоларимизни таҳлил қилдик. Энди эса бизни олдиндан «Зоб Аҳан» билан жуда жиддий ўйин кутмоқда. Айнан мана шу учрашувда нимчорак финал йўлланмаси ҳал бўлади.

Бугун 2та гол урдим. Жаримадан гол урган пайтим аслида тўпни шерикларимга ошириб бермоқчи эдим. Тўп эса дарвозага бориб тушди. Буни сўнгги пайтларда бизга етишмаётган омад билан боғлаган бўлардим. Энг муҳими – жамоамиз ғалаба қозонди. Мен мана шундан жуда хурсандман. Умид қиламанки, келгуси учрашувларда ҳам ғалаба биз томонда бўлади, - деди Сардор Мирзаев.