Xabaringiz bor, 20-30 aprel kunlari Urganch shahrida o‘smirlar va yoshlar o‘rtasida og‘ir atletika bo‘yicha Osiyo chempionati bo‘lib o‘tadi. Ushbu qit’a chempionati Buenos-Ayresda bo‘lib o‘tadigan III o‘smirlar Olimpiya o‘yinlariga yo‘llanma berishi bilan ham ahamiyatlidir.

Musobaqada ishtirok etadigan o‘zbekistonlik sportchilar 3 aprel kuni o‘quv-mashg‘ulot yig‘inlarini boshlab yuborganlar. O‘g‘il bolalar terma jamoamiz Toshkent viloyatidagi Chorbog‘ bazasida mashg‘ulot olib borayotgan bo‘lsalar, qizlarimiz chempionat o‘tkaziladigan Urganch shahrida yig‘inga kirishganlar.

Osiyo chempionatiga 350 nafardan ortiq sportchi tashrif buyurishi kutilmoqda. Murabbiy, rasmiy shaxslar bilan qo‘shib hisoblaganda mamlakatimizga keladigan mehmonlar soni 450 nafardan oshib ketadi.

Qit’a chempionatiga tayyorgarlik jarayonini kuzatish maqsadida O‘zbekiston Respublikasi Jismoniy tarbiya va sport vaziri Shoakram Isroilov ayni paytda Xorazmda bo‘lib turibdi. Vazir Osiyo chempionati ishtirokchilarini qabul qiladigan mehmonxonalar, musobaqa bo‘lib o‘tadigan sport majmuasi, chempionat ishtirokchilari va mehmonlar uchun yaratilgan sharoitlar bilan yaqindan tanishdi.

Osiyo chempionatida yurtimiz sharafini himoya qiladigan sportchilarimiz tarkibi bilan keyinroq tanishtirib o‘tamiz.