17 aprel sanasida Ispaniya La Ligasining 3 kun davom etadigan 33-tur bahslari boshlandi.

33-tur doirasida «Barselona» Vigoda «Selta» mehmoni bo‘ldi. Ushbu o‘yinda «Barselona»ning Leo Messi, Luis Suares kabi yetakchilari zaxirada qoldirildi. Mazkur o‘yindagi g‘alaba kataloniyaliklarga chempionlik unvoniga yanada yaqinlashib olishiga ko‘mak berardi. ​Ammo uchrashuv «Barselona»ning g‘alabasi bilan yakunlanishiga «Selta» yo‘l qo‘ymadi.

Avvaliga Usmon Dembele 36-daqiqada kataloniyaliklarni hisobda oldinga olib chiqqan bo‘lsa, 45-daqiqada «Selta» a’zosi Xonatan Kastro tablodagi hisobni 1:1 bo‘lishini ta’minladi. Ikkinchi bo‘limda Pako Alkaser yana «Barsa»ni oldinga olib chiqqan bo‘lsa, uchrashuvning 82-daqiqasiga kelib Yago Aspas Mark Andre ter Shtegendan qaytgan to‘pni darvozaga aniq yo‘lladi. Qayd etish joiz, zaxiradan maydonga tushirilgan «Barselona» a’zosi Serxi Roberto 71-daqiqada hakam tomonidan maydondan chetlatildi. Shu tariqa uchrashuv tomonlarning 2:2 hisobidagi durang natijasi bilan yakunlandi.

Mazkur natijadan kyin "ko‘k-anorranglilar" hisobidagi ochkolar soni 83taga yetdi. Ular 33-tur bahsini bugun o‘tkazadigan "Atletiko"dan 12 ochko oldinda borishmoqda.

«Sevilya» esa safarda «Deportivo» mehmoni bo‘lib, golsiz durang natijasini qayd etdi.

Ispaniya La ligasi, 33-tur
Selta – Barselona 2:2 (1:1, 1:1)
Gollar: 0:1 – 36 Dembele, 1:1 – 45 Kastro, 1:2 – 64 Pako Alkaser, 2:2 – 82 Aspas.
Selta – Alvares, Vass, Ronkalya, Gomes, Kastro, Brais Mendes (Boye, 83), Xosabed (Radoya, 73), Lobotka, Sisto (Mor, 79), Maksi Gomes, Aspas.
Barselona – ter Shtegen, Nelson Semedu, Mina, Vermalen, Din, Andre Gomesh (Serji Roberto, 60), Paulinyo, Dembele (Aleish Vidal, 78), Denis Suares, Koutinyo (Messi, 60), Pako Alkaser.
Ogohlantirishlar: Aspas (56), Vass (78), Kastro (88).
Chetlatish: Serji Roberto (71).