O‘zbekiston futbol assosiasiyasi tomonidan yurtimizdagi hakamlar saviyasini oshirish va futbol uchrashuvlarida sifatli hakamlikni ta’minlash uchun bir qator chora-tadbirlarni amalga oshirmoqda.
Jumladan, kecha “Bunyodkor” stadionida Superliga hakamlari uchun bir kunlik seminar bo‘lib o‘tdi. Seminarni O‘FA Hakamlar va nazoratchilar boshqarmasi boshlig‘i Ma’mur Saidqosimov, boshqarma mutaxassislari Bobur Haydarov, Baxtiyor Namozov hamda FIFA referisi Ravshan Ermatov va FIFA instruktori Farhod Abdullayev olib borishdi.
Kunning birinchi yarmida hakamlar uchun nazariy mashg‘ulotlar o‘tkazildi. Yig‘ilganlarga O‘FA Ilmiy-metodik guruhi tomonidan tayyorlangan Superliga klublarining taktik o‘yin uslublari va o‘ziga xos jihatlari haqida ma’lumotlar berildi. Bu ma’lumotlar Superliga hakamlari uchun uchrashuvlarni boshqarishda asqotishi aniq.
Keyin hakamlar maydonda amaliy mashg‘ulotlar o‘tkazishdi. Mashg‘ulotlar davomida o‘yinda ro‘y beradigan bahsli vaziyatlar yaratildi va hakamlarning bu vaziyatlarda amalga oshirishi kerak bo‘lgan xatti-harakatlari ko‘rsatib berildi.
Seminardan ko‘zlangan asosiy maqsad Superliga hakamlari malakasini muntazam ravishda oshirib borish va uchrashuvlarda sifatli hakamlikni ta’minlashdan iborat.
Bunday seminarlarni yil davomida doimiy ravishda o‘tkazib borish rejalashtirilgan.
