Urganch shahrida og‘ir atletika bo‘yicha o‘smirlar va yoshlar o‘rtasida Osiyo chempionati davom etmoqda. Yoshlar o‘rtasidagi bellashuvlarda -69 kg vazn toifasida yurtimiz sharafini himoya qilgan Adhamjon Ergashev ikkikurash natijasiga ko‘ra sovrindorlar qatoridan joy oldi.

Hamyurtimiz dast ko‘tarishda 131kg. og‘irlikni o‘ziga bo‘ysundirib, bu borada eng yaxshi natijaga sazovor bo‘ldi va oltin medali bilan taqdirlandi. Siltab ko‘tarishda esa Adhamjon 167 kg. tosh ko‘tara oldi. Ushbu natijasi bilan u ikkinchi o‘ringa loyiq ko‘rildi. Yakunda, umumiy hisobda 298 kg. natija ko‘rsatgan Adhamjon Ergashev, ikkurash natijasiga ko‘ra Osiyo chempionatining kumush medali sohibiga aylandi.

E’tiborlisi, u birinchi o‘rinni qo‘lga kiritgan vyetnamlik Kuang Trong Nguyendan bor yo‘g‘i 1 kilogrammga ortda qoldi. Uchinchi o‘rin va bronza medali esa ikkikurash natijalariga ko‘ra 275 kg. tosh ko‘targan boshqa bir vyetnamlik polvon Van Xyu Nguyenga nasib qildi. Ushbu vazn toifasida ishtirok etgan yana bir vakilimiz Hakimjon Shamsiddinov ham bronza medalini qo‘lga kiritgan raqibi bilan teng natija qayd eta olgandi. Biroq, qoidalarga ko‘ra, bunday holatda vazni nisbatan kamroq bo‘lgan sportchi yuqori o‘ringa chiqadi.

Bu ikkikurash yakunlariga ko‘ra terma jamoamizning Osiyo chempionatidagi uchinchi medali bo‘ldi. Bungacha qizlar o‘rtasida bo‘lib o‘tgan bellashuvlarda Nigora Abdullayeva oltin, Zuhra Otajonova esa kumush medalga sazovor bo‘lgandi.