26 aprel kuni O‘zbekiston gimnastika federasiyasi Xalqaro gimnastika federasiyasidan maktub qabul qilib oldi. Unda sport akrobatikasi bo‘yicha O‘zbekiston terma jamoasi shu yilning oktyabr oyida Buenos-Ayres shahrida bo‘lib o‘tadigan III yozgi Olimpiya o‘yinlariga lisenziya qo‘lga kiritgani rasman tasdiqlandi.

Bundan bir necha kun oldin, aniqrog‘i 5-11 aprel kunlari sport akrobatikasi bo‘yicha O‘zbekiston terma jamoasi a’zolari Nikolay Yevdokimov va Xursana Magmuzovalardan tashkil topgan juftlik Belgiyada bo‘lib o‘tgan jahon chempionatida ishtirok etishgandi. Olimpiya o‘yinlari lisenziyasi aynan mazkur jahon chempionati yakunlari bo‘yicha terma jamoamizga berildi.

Ma’lumot uchun, O‘zbekiston uchun sportning ushbu turida yagona lisenziya ajratilgan. Shunday ekan, musobaqalarga ikkita juftlik (Nikita Yevdokimov/Xursana Magzumova hamda Nikolay Yevdokimov/Arina Yulusheva) tayyorgarlik ko‘radi. Buenos Ayresga jo‘nab ketish oldidan o‘quv-mashg‘ulot yig‘inlari yakuniga ko‘ra murabbiylar kengashi ular orasidan eng yaxshisini tanlab oladi va aynan o‘sha juftlik o‘smirlar Olimpiadasida yurtimiz sharafini himoya qiladi.

Milliy olimpiya qo‘mitasi shuni ma’lum qiladiki, ayni paytda III yozgi o‘smirlar Olimpiya o‘yinlariga 13 nafar o‘zbekistonlik sportchi 11 ta lisenziya qo‘lga kiritgan. (Akademik eshkak eshish va sport akrobatikasida 2 kishilik juftlikka bittadan lisenziya berilgan.)

Hozirgi paytga qadar delegasiyamiz hisobidagi lisenziyalar soni quyidagicha ko‘rinish olgan:

Og‘ir atletika – 3 ta
Baydarka va kanoeda eshkak eshish – 3 ta
Akademik eshkak eshish – 2 ta
Ot sporti (konkur) – 1 ta
Taekvondo – 1 ta
Sport akrobatikasi – 1 ta