Tokio shahrida sinxron suzish bo‘yicha FINA jahon seriyasi bellashuvlari bo‘lib o‘tmoqda.
Unda jahonning 18 mamlakatidan sportchilar ishtirok etishmoqda. Ular qatorida O‘zbekiston terma jamoasi a’zolari ham o‘z omadini sinab ko‘rmoqda.
Qizlarimiz guruh bellashuvlarida erkin chiqish bo‘yicha mashqlarda 80,3000 ball to‘plab, bronza medalini qo‘lga kiritdilar. Bu borada Yaponiya birinchi, Fransiya terma jamoasi qizlari esa ikkinchi o‘rinni egallashdi.
«Highlight» mashqlarida esa terma jamoamiz a’zolari 79,4000 ball jamg‘arib, kumush medalga sazovor bo‘lishdi. 85,2667 ball to‘plagan fransiyalik qizlar esa oltin medalni qo‘lga kiritdilar.
Ma’lumot uchun, «Highlight» akrobatik mashqlardan tashkil topgan qiyin dastur hisoblanadi. O‘zbekiston terma jamoasida akrobatik mashqlar murabbiy Farhod Hikmatov boshchiligida olib boriladi.
Eslatib o‘tamiz, bundan bir necha kun oldin Xitoydagi Jahon seriyasining solo bo‘yicha erkin chiqish bahslarida Xonzoda Toshxo‘jayeva oltin, «Highlight»ning jamoaviy erkin dasturida esa terma jamoamiz a’zolari bronza medallarini qo‘lga kiritgandilar.
