O‘zbekiston milliy olimpiya qo‘mitasi prezidenti va O‘zbekiston futbol assosiasiyasi 1-vise-prezidenti Umid Ahmadjonov OFK prezidenti Shayx Salmon bin Ibrohim al-Xalifa taklifiga ko‘ra Osiyo Kubogi – 2019 musobaqasiga qur’a tashlash marosimida qatnashish uchun Dubayga yo‘l olgani haqida avval xabar berib o‘tgandik.

Umid Ahmadjonov Dubayda Osiyo velosport konfederasiyasi prezidenti, shuningdek, BAA milliy olimpiya qo‘mitasi prezidenti bilan uchrashib, o‘zaro hamkorlik masalalari bo‘yicha kelishuvga erishdi.

Bugun Umid Ahmadjonov Dubayda KONKAKAF vakillari AQSH, Kanada va Meksika futbol federasiyalari prezidentlari bilan ko‘rishdi. Jumladan, AQSH futbol federasiyasi prezidenti Karlos Kardeyro, Meksika futbol federasiyasi prezidenti Desio de Mariya Serrano va Kanada futbol federasiyasi prezidentlari bilan suhbat chog‘ida futbol rivoji yo‘lida o‘zaro tajriba almashish, bolalar va ommaviy futbol bo‘yicha mutaxassislarni jalb qilish, marketing va homiylarni jalb qilish masalalarida hamkorlik bo‘yicha o‘zaro fikr almashildi.

O‘z o‘rnida shuni ta’kidlab o‘tish kerakki, AQSH, Kanada va Meksika tarixda birinchi marta 2026 yilga Jahon chempionati qo‘shmezbonligi uchun da’vogarlik qilmoqda. Shu jihatdan olib qaraydigan bo‘lsak, KONKAKAF vakillari uchun Osiyoda o‘z o‘rniga ega bo‘lgan O‘zbekiston futbol assosiasiyasi bilan hamkorlik qilish o‘zaro manfaatli hisoblanadi.