Bugungi kunda respublikada barkamol avlodga va ularning sport bilan shug‘ullanishiga katta e’tibor qaratilmoqda. Xususan, O‘zbekiston Respublikasi Prezidentining mutasaddilarga hududlarni piyoda aylanib, amalga oshirilayotgan ishlar bilan tanishish to‘g‘risida bergan topshirig‘i diqqatga sazovordir.

Bu tadbir amalga oshirilayotgan jarayonlar ustida  ish olib borayotganlarga qo‘shimcha ruh va kuch bag‘ishlashi turgan gap.

Namangan shahar hokimi Shavkatjon Abdurozzoqov va shahar prokurori bolalar shug‘ullanayotgan futbol maydoniga tashrif buyurdi.

E’tiborli tomoni salom-alikdan so‘ng hokim va prokuror kutilmaganda bolalar bilan mashg‘ulotga kirishib ketdi. Jumladan, bunda Shavkatjon Abdurazzoqov futbolchi sifatida to‘pni havoda bir necha daqiqa tepib turib, stadiondagi bolalarga qo‘shimcha master klass o‘tadi.

Shahar prokurori esa mashg‘ulotlar davomida darvozabonlik qilib, o‘zining bu boradagi mahoratlarini yoshlarga ulashdi.

Futbol mashg‘ulotlari bilan shug‘ullanayotgan bolalar bilan suhbat so‘ngida shahar hokimi quyidagilarni ta’kidlab o‘tdi:

“Namangandan Odil Ahmedovdek futbolchilar yetishib chiqqan. Bundan g‘ururlanish kerak. Shuning uchun sizlar ham kamida Odil Ahmedov  kabi harakat qilinglar”.