Futbol muxlislariga yaxshi ma’lumki, O‘zbekiston Respublikasi Prezidenti Shavkat Mirziyoyevning 2018 yil 16 martdagi PQ-3610-sonli “Futbolni yanada rivojlantirish chora-tadbirlari to‘g‘risida”gi qaroriga asosan Murabbiylar va hakamlarni tayyorlash Respublika maktabi faoliyati tugatilib, murabbiylar va hakamlarni tayyorlash, qayta tayyorlash va malakasini oshirish vakolati O‘FA qoshidagi tegishli boshqarmalarga berildi. 

O‘FAning Murabbiylar tayyorlash boshqarmasi tomonidan “O‘zbekistonda futbol murabbiylarini o‘qitish va tayyorlash hamda attestasiyadan o‘tkazish bo‘yicha Nizom” ishlab chiqildi va tasdiqlandi. 

Ushbu Nizom talablarini bajarish uchun joriy yilning 17 may - 30 iyun kunlari OFK lisenziyasiga ega bo‘lgan barcha murabbiylar bilan seminar-treninglar tashkil qilinadi. O‘FAning mutassaddilari va mutaxassislaridan tashkil topgan ishchi-guruhlar butun respublika hududlari bo‘ylab murabbiylarning malakaviy saviyasini tekshirish bo‘yicha xizmat safarlariga yuboriladi. 

Shuningdek, ishchi-guruhlar oldiga murabbiylarni tayyorlashning yangi tizimi bilan tanishtirish, ularning amaliy va nazariy bilimlarini tekshiruvdan o‘tkazish hamda murabbiylarni qiziqtirgan boshqa ma’lumotlar bilan tanishtirish vazifalari yuklatilgan. 

Bundan tashqari, hududlarga safar davomida ishchi guruh vakillari yangi tashkil etilayotgan bolalar va o‘smirlar futbol akademiyalari murabbiyligiga nomzodlarni aniqlab, bu borada O‘FA rahbariyatiga tavsiyalar berib borishi rejalashtirilgan.

Hududlardagi murabbiylar o‘rtasida o‘quv seminarlari tashkil qilish va ularning malakaviy saviyasini tekshirish  jadvali

Andijon 17 – 21 may
Farg‘ona 22 – 26 may
Namangan 27 – 31 may
Qoraqalpog‘iston Respublikasi 7 – 10 iyun
Xorazm 11 – 14 iyun
Buxoro 15 – 19 iyun
Navoiy 20 – 23 iyun
Samarqand 18 – 21 may
Qashqadaryo 22 – 25 may
Surxondaryo 26 – 30 may
Jizzax 7 – 10 iyun
Sirdaryo 11 – 14 iyun
Toshkent viloyati 15 – 19 iyun
Toshkent shahri 26 – 30 iyun