O‘zbekiston Superligasi 12-turi doirasida "Lokomotiv" - "Qizilqum" (2:2) uchrashuvidan keyingi matbuot anjumanida mehmonlar ustozi Hamidjon Aktamov hamda jamoadagi uchrashuvning eng yaxshi futbolchisi Georgiy Kvesiyeshvili qatnashdi.

- O‘yin kutganimizdan ham qiziq o‘tdi. Bizni qo‘llashga kelgan muxlislarga rahmat aytaman. Ularning bizga katta yordami tegdi. Umuman olganda biz 100 foizlik g‘alabani qo‘ldan chiqardik. Chiroyli o‘yin bo‘ldi, "Lokomotiv" tajribali jamoa. Ularning ustidan g‘alaba qozonishimiz mumkin edi. Zaxiradan tushgan o‘yinchilarimiz ishonchni oqlay olishmadi. "Lokomotiv"ga omad tilayman.

Sidorovdan ko‘nglim to‘lyaptimi? Sidorov ikki marta termaga chaqirildi kechagi mashg‘ulotlarda qatnashmadi. Shu boisdan o‘yinga bo‘lgan rejalarni bilmadi. U yaxshi formada. Bilasiz, zaxira o‘rindig‘imiz tor. Shunday bo‘lsa-da, bugun shogirdlarim yaxshi o‘yin ko‘rsatdi. Hech qaysi futbolchimga e’tirozim yo‘q. G‘alabani ushlab qolishimiz uchun 30 soniya yetmadi.

Yangi futbolchilar bilan muzokaralar olib boryapmiz. Kamida 5-6 futbolchi bilan tarkibni kuchaytiramiz.

Men faqatgina o‘zimning futbolchilarimning o‘yinlarini kuzataman. "Lokomotiv"ning kuchli va zaif tomonlarini ayta olmayman. Biroq bunday jamoa bilan uchrashuvda durangdan ham mamnun bo‘ldim.

Georgiy Kvesiyeshvili: - Yaxshi o‘yin bo‘ldi, ikki jamoa ham so‘nggi daqiqalarda natija uchun o‘ynadi. "Lokomotiv" bilan yomon o‘yin ko‘rsatmadik. Bizda ham vaziyatlar bo‘ldi. O‘z ustimizda ishlashda davom etamiz. Bunday raqiblar bilan uchrashuvda durang ham bizni qanoatlantiradi.