1 iyun — Xalqaro bolalar kuni munosabati bilan Qoraqalpog‘iston Respublikasining markazi Nukus shahridagi "Turon" stadionida O‘FA tomonidan katta tadbir tashkil etiladi.
Dastlab, shu kuni soat 17:00da boshlanadigan tadbirning ilk qismida, qoraqalpog‘istonlik yoshlar uchun O‘FAning maxsus futbol festivali bo‘lib o‘tadi. 200 nafar jajji bolajonlarga shu kuni Doston Hamdamov, Otabek Shukurov va Eldor Shomurodov kabi O‘zbekiston milliy terma jamoasi a’zolari master-klass o‘taydilar. Futbol bilan bir qatorda, hududdagi yosh velopoygachilarning chiqishini ham ko‘rishingiz mumkin bo‘ladi. Shu bilan bir qatorda, sportning yengil atletika turi bo‘yicha musobaqa tashkil etiladi.
Shundan so‘ng Azamat Abduraimov boshchiligidagi O‘zbekiston o‘smirlar terma jamoasi ilk o‘rtoqlik uchrashuvini Qoraqalpog‘iston Respublikasi va Xorazm viloyatlaridan tashkil topgan hudud terma jamoasiga qarshi o‘tkazadilar. Tanaffus paytida ham muxlislar zerikib qolmaydilar, konsert dasturi davom etadi.
Undan avval O‘FAning ishchi guruhi hamda futbolchilar Qoraqalpog‘iston Respublikasidagi maktabgacha ta’lim muassasalarida master klasslar o‘tkazib, sovg‘alar bilan bolakaylarni xursand qiladilar.
Qoraqalpog‘istonlik muxlislarni 1 iyun kuni soat 17:00dan boshlab "Turon" stadioniga taklif etamiz!
