Xabar berib o‘tganimizdek Butunjahon etnosport konfederasiyasi rahbari, Kamonchilar fondi vasiylik kengashi raisi, Turkiya yoshlar fondi Oliy maslahat kengashi a’zosi Najmiddin Bilol Erdogan va “Turkiya-O‘zbekiston” parlamentlararo do‘stlik guruhi raisi, Turkiya Buyuk Millati Majlisi a’zosi Haydar Ali Yildiz boshchiligidagi katta delegasiya ayni paytda mamlakatimizda mehmon bo‘lib turibdi.

Kun avvalida mehmonlar Toshkentdagi diqqatga sazovor joylarni aylanishdi, Samarqanddagi kamondan o‘q otish bo‘yicha VI xalqaro «Fotih kubogi» musobaqasiga bag‘ishlangan tadbirda ishtirok etishdi.

So‘ngra delegasiya vakillari «Hazrati Hizr» majmuasiga tashrif buyurib, O‘zbekistonning birinchi Prezidenti Islom Karimovni yod etishdi. Bilol Erdogan marhum Prezidentimiz haqqiga qur’on tilovat qildi. Majmuada Islom Karimov qabriga gul qo‘yildi.

Eslatib o‘tamiz, mehmonlarga O‘zbekiston Milliy olimpiya qo‘mitasi Prezidenti Umid Ahmadjonov hamda Jismoniy tarbiya va sport vaziri Shoakrom Isroilovlar hamrohlik qilishmoqda.