O‘zbekiston futbol assosiasiyasi va Professional futbol ligasi milliy chempionatimizda ishtirok etayotgan futbolchi va murabbiylarning nafaqat jismoniy jihatdan yetuk, balki ma’nan barkamol bo‘lishi uchun ham bir qator chora-tadbirlarni yo‘lga qo‘ygan.

Jumladan, O‘zbekiston milliy olimpiya qo‘mitasi prezidenti va O‘zbekiston futbol assosiasiyasi birinchi vise-prezidenti Umid Ahmadjonovning topshirig‘iga ko‘ra har oyning dushanba kunlari Superliga klublarida ma’naviyat va ma’rifat darslari bo‘lib o‘tmoqda.

Bunday darslarda yurtimizda amalga oshirilayotgan keng ko‘lamli islohotlar, mamlakatimiz Prezidenti muhtaram Shavkat Mirziyoyev tomonidan O‘zbekistonda sportni, xususan, futbolni rivojlantirish maqsadida qabul qilinayotgan qarorlar mazmuni futbolchi va murabbiylarga etkazilmoqda.

Bugun boshqa jamoalar qatori "Paxtakor" futbol klubida ham ma’rifat va ma’naviyat soati o‘tkazildi. Unda jamoa a’zolariga O‘zbekistonda bo‘layotgan so‘nggi siyosiy va madaniy-ma’rifiy sohalardagi o‘zgarishlar haqida atroflicha ma’lumot berildi.

Shuningdek, “Ma’naviyat va ma’rifat darsi”da yurtimizda futbolni rivojlantirish, yangi bosqichga olib chiqish borasida amalga oshirilayotgan islohotlar, yangiliklar haqida so‘z yuritildi.

Bu kabi ma’naviyat va ma’rifat darslari milliy chempionatimizda to‘p surayotgan futbolchilarga xalqaro maydonlarda Vatan sha’ni uchun maydonga tushayotganda qo‘shimcha ruhiy ozuqa taqdim qilishi aniq.