Navbatdagi Jahon Chempionatiga ham sanoqli kunlar qoldi. Afsuski, Rossiyadagi mundialda ham Braziliya, Ispaniya, Germaniya kabi terma jamoalarga muxlislik qilishga majburmiz. Yarani yangilash niyatimiz yo‘q.
Zero O‘zbekiston navbatdagi bor mundialdan quruq qolgandan so‘ng mamlakat futbolida katta o‘zgarishlar boshlanishi kutildi. Va bu qaysidir ma’noda boshlandi ham. O‘FF o‘z nomini O‘FAga o‘zgartirdi, Oliy Liga Superliga (yanada aniqrog‘i Pepsi Superliga) nomini oldi, Kubok bahslari Angliyadagi kabi bo‘ldi. PFL o‘z logotipini milliy uslubdagi ko‘rinishga o‘tkazdi(ha, aytgancha yaqinda «Bunyodkor» stadioni ham milliycha nom oladi). Bir qarasang, «Real» bir qarasang, «Inter»ning Toshkentda akademiyalari ochilishi haqida xabarlar. Ha, O‘FA ishlayapti. Buni inkor qilish niyatimiz yo‘q. Ahmadjonovning o‘zi mundialdan so‘ng milliy termaning mashhur murabbiyini e’lon qilinishi borasidagi bayonoti esa jurnalistlar va futbol muxlislarining Jahon Chempionatining boshlanishidan ko‘ra uning tugashini ilhaq bo‘lib kutishiga sabab bo‘lmoqda.
O‘FAning ayni vaqtdagi rahbariyatining avvalgilaridan farqi jahonning kuchli terma jamoalari bilan o‘rtoqlik uchrashuvlari tashkil etishda ham ko‘zga tashlanmoqda. Jumladan, Marokash, Senegal kecha esa Janubiy Amerikaning bir necha bor chempioni, Jahon Chempionatining ikki bor g‘olibi, tarkibida Luis Suares hamda Edinson Kavanidek hujumchilari bor Urugvay terma jamoasiga qarshi o‘rtoqlik o‘yini o‘tkazildi. Ushbu bahslarda asosan 23 yoshgacha Osiyo chempionatida g‘olib bo‘lgan o‘yinchilar ishtirok etganini yaxshi holat deb qabul qilsa bo‘ladi. Avlodlar almashinuvi davri kelgan vaqtda iqtidorli o‘yinchilarga yo‘l ochilishi har holda quvonarli. Biroq jamoaning Urugvayga 0:3 hisobida mag‘lub bo‘lganidan xursand bo‘lish, atigi 3 to‘p farqi bilan mag‘lub bo‘lishgani maqtagulik holat emas. Mazkur 3 bahsning o‘ziyoq terma jamoada, umuman, o‘zbek futbolida qilinadigan ishlar hali yetarli darajada ko‘p ekanligini ko‘rsatadi. Hozirgi termaning natijalari qoniqarli emas. Biroq hammasi vaqtga bog‘liq, albattta. Bu o‘yinlarning foydasi haqida esa faqatgina Osiyo Kubogi va Qatarda bo‘ladigan JCH—2022 saralashidan so‘ng fikr bildirish joiz bo‘ladi, nazarimizda.
Shu o‘rinda O‘FAning ba’zi holatlarni nazardan chetda qoldirayotganini ta’kidlash lozim. Jumladan, O‘zbekiston milliy termasi kecha O‘FA logotipi tushirilgan liboslarda emas, aksincha eski O‘FF (UFF) logotipi tushiriligan liboslarda maydonga tushdi. Maydondagi innovasion tabloda ham O‘FA emas, O‘FF logotipi ko‘rsatildi.
Modomiki, O‘FA professionallikka intilar ekan, bunday holatlarga ortiq ko‘z yumib bo‘lmaydi. Bu esa tashkilotning marketing sohasida qiladigan ishlari ko‘p ekanligini ko‘rsatadi.
Xulosa qiladigan bo‘lsak, roppa-rosa 6 kundan so‘ng boshlanadigan JCH—2018 ni ilhaq bo‘lib kutishda davom etamiz. Ungacha esa Superliga, uzr, kechirasiz-a, Pepsi Superligasi bahslarining navbatdagi turini ko‘rib, futbolga bo‘lgan chanqog‘imizni bostirib turamiz, aziz muxlis!
