Avval xabar berganimizdek, FIFA Rossiyaning “Gazprom” kompaniyasi bilan hamkorlikda “Futbol do‘stlik uchun” ijtimoiy loyihasining 6 mavsumiga start bergandi. Bugun Moskvadagi “Spartak” klubi akademiyasi maydonida mazkur loyihaning ochilish marosimi bo‘lib o‘tdi.

Bu yil “Futbol do‘stlik uchun” loyihasida dunyoning 211ta mamlakatidan tashrif buyurgan 1500 nafarga yaqin bolalar ishtirok etishmoqda. 

O‘zbekistondan mazkur loyihada yosh darvozabon Muslim Abdumannopov va yosh jurnalist Mardon Marupov ishtirok etmoqda. Ular tadbirning ochilish marosimida O‘zbekiston bayrog‘ini baland ko‘targan holda ishtirok etishdi. Bugundan futbol musobaqalariga start berildi. Muslim Abdummanopov darvozabon sifatida futbol musobaqalarida ishtirok etsa, Mardon Marupov o‘tkazilayotgan uchrashuvlarni jurnalist sifatida media markazda yoritib boradi. 

 Loyihaning asosiy maqsadi butun dunyodagi yosh avlod o‘rtasida do‘stlik, tinchlik, turli millat va madaniyat vakillariga hurmat kabi yuksak insoniy tushunchalarni targ‘ib qilishdan iborat. 

Eslatib o‘tamiz, O‘zbekiston futbol assosiasiyasi mazkur loyihada ikkinchi marta ishtirok etyapti. O‘tgan yili “Futbol do‘stlik uchun” loyihasida yurtimiz sharafini “Lokomotiv” Toshkent vakili Ilyos Ahmedov (darvozabon) va yosh jurnalist Amir Sharipov himoya qilgandi.