Yevropalik murabbiylar turli yo‘nalishlar bo‘yicha harakatga tushdilar. Vaholanki, «ko‘hna qit’a» futbolida hozircha katta transferlar kuzatilgani yo‘q.
Xullas, «SSF» nashri nomdor murabbiylarning migrasiyasi allaqachon avj pallasiga kirganidan hayratlanib, barchasini yaxlit tasvirda ifoda etishga urinib ko‘rdi.
Antonio Konte hozircha yangi ish topmagan bo‘lsa, Karlo Anchelotti «Napoli» boshqaruvini o‘z qo‘liga oldi. Londonning «Arsenal» klubi rahbariyati esa baskoniyalik mutaxassis Unai Emeri bilan shartnoma tuzganini rasman tasdiqladi.
Bular mavsumlar oralig‘idagi ilk tayinlovlar ham, oxirgilari ham emas. Deylik, Emerining «PSJ» bilan xayrlashishiyu, bo‘shagan joyni Dortmund «Borussiya»si sobiq bosh murabbiyi Tomas Tuxel egallashi ancha oldin aniq bo‘lgandi.
Baskoniyalik parijliklar bilan mavsum davomida naq 4ta sovrin yutdi, biroq «poker» ham uning Fransiya poytaxtida qolishiga kamlik qildi. «Murabbiycha» (Emeri Moskvaning «Spartak» klubini boshqarganida, Artyom Dzyuba uni shunday «ta’riflagandi») endi Londonda «Arsenal» va o‘z obro‘sini tiklashga urinib ko‘radi.
Bilasiz, «kanonirlar» 22 yillik faoliyati davomida jamoa bilan loaqal 1ta yevrokubok yutolmagan Arsen Vengerni nihoyat, nafaqa (balki boshqa klubgadir) kuzatib qo‘yishdi. Taqqoslash uchun aytsak, Emeri «Sevilya»ni Yevropa Ligasida 3 bora g‘oliblik shohsupasiga yetaklagan.
Umuman, «murabbiylar «bozori»da oltin talvasasi boshlandi, chog‘i. Antonio Konte erta-indin «Chelsi»dan ketsa kerak, ammo uning uchun Italiya terma jamoasiga yo‘l yo‘q - Roberto Manchini vaqtida «talmovsiradi».
O‘z o‘rnida, «Zenit» bosh murabbiyi vakolatini «Napoli»ga keragi bo‘lmay qolgan Maurisio Sarri qo‘lga olishi mumkin. To‘g‘ri, Piter klubi rahbariyati boshqa nomzodlarga ham jiddiy qaramoqda.
Chunonchi, Sarri har lahzada Angliya klublaridan biri taklifiga ijobiy javob berishi hech gap emas. Misol uchun, u «Chelsi»ga moyildek. Xullas, murabbiylar migrasiyasi hozirning o‘zida chuvilgan to‘pchani eslatmoqda. Qolaversa, umumiy manzara kun sayin o‘zgarib turadi...
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
