Kecha poytaxtimizdagi Toshkent davlat yuridik Universiteti sport zalida O‘zbekiston huquqni muhofaza qilish organlari xodimlari o‘rtasida musobaqa boshlanganligi haqida xabar berib o‘tgandik.

Milliy olimpiya qo‘mitasi tashabbusi bilan tashkil qilingan turnirda O‘zbekiston Respublikasi Davlat bojxona qo‘mitasi, Bosh Prokuratura, Ichki ishlar vazirligi, Mudofaa vazirligi, Davlat Soliq qo‘mitasi, Davlat xavfsizlik xizmati, Adliya vazirligi jamoalari sovrinli o‘rinlar uchun kurash olib borishdi. Kecha musobaqada guruh bosqich bahslari o‘tkazilgandi. O‘z guruhlarida dastlabki ikki o‘rinni qo‘lga kiritgan jamoalar hal qiluvchi bosqichga yo‘l olgandilar.

Bugun turnirda sovrindorlar nomi ma’lum bo‘ldi. Uchinchi o‘rinni Davlat xavfsizlik xizmati xodimlaridan tashkil topgan jamoa egalladi. Hal qiluvchi o‘yinda esa Bosh prokuratura va Ichki ishlar vazirligi jamoalari to‘qnash kelishdi. Keskin kurashlarga boy kechgan o‘yinda Bosh prokuratura xodimlaridan tuzilgan jamoa 3:2 hisobida g‘alaba qozondi va turnir g‘olibiga aylandi.