Кеча пойтахтимиздаги Тошкент давлат юридик Университети спорт залида Ўзбекистон ҳуқуқни муҳофаза қилиш органлари ходимлари ўртасида мусобақа бошланганлиги ҳақида хабар бериб ўтгандик.
Миллий олимпия қўмитаси ташаббуси билан ташкил қилинган турнирда Ўзбекистон Республикаси Давлат божхона қўмитаси, Бош Прокуратура, Ички ишлар вазирлиги, Мудофаа вазирлиги, Давлат Солиқ қўмитаси, Давлат хавфсизлик хизмати, Адлия вазирлиги жамоалари совринли ўринлар учун кураш олиб боришди. Кеча мусобақада гуруҳ босқич баҳслари ўтказилганди. Ўз гуруҳларида дастлабки икки ўринни қўлга киритган жамоалар ҳал қилувчи босқичга йўл олгандилар.
Бугун турнирда совриндорлар номи маълум бўлди. Учинчи ўринни Давлат хавфсизлик хизмати ходимларидан ташкил топган жамоа эгаллади. Ҳал қилувчи ўйинда эса Бош прокуратура ва Ички ишлар вазирлиги жамоалари тўқнаш келишди. Кескин курашларга бой кечган ўйинда Бош прокуратура ходимларидан тузилган жамоа 3:2 ҳисобида ғалаба қозонди ва турнир ғолибига айланди.
