“Navbahor” – “Qo‘qon-1912” uchrashuvidan keyingi matbuot anjumanining birinchi qismida No‘’mon Hasanov va yarim himoyachi Javohir Sidiqovlar ishtirok etishdi.
No‘’mon Hasanov: - Kiyinish xonasida futbolchilarning kayfiyati yo‘q ekanligini sezdim. Ularni yupatishga harakat qildim. Bu yigitlar Qo‘qon futboli uchun ko‘p mehnat qilishgan. Bu futbol shunday mag‘lubiyatlar ham uchrab turadi.
Mavsumni yaxshi boshlagan edik. Negadir so‘nggi uchrashuvlarda o‘yinimiz qovushmayapti. “Navbahor” jamoasini g‘alaba bilan tabriklayman. Ularga keyingi o‘yinlarda omad tilayman.
Davralar oralig‘ida tarkibimizni yaxshi o‘yinchilar bilan boyitishni istaymiz. Barchasi moliyaviy imkoniyatimizga bog‘liq bo‘lib qolyapti. Dastlabki 15 daqiqada futbolchilar umuman ishonchimni oqlay olishmadi.
Shuning uchun tezkor futbolchi almashtirishga majbur bo‘ldim. Muxlislarimizdan sabr qilishlarini surab qolardim. Ularni ishonchini qaytarish uchun borimizni berib harakat qilamiz.
Javohir Sidiqov: - “Navbahor” o‘z maydonida kuchli o‘ynashini bilardik. Grand jamoalar ham Namanganda mag‘lubiyatga uchrashdi. Shunga monand tayyorgarlik ko‘rgandik. Tezkor gol rejalarimizni buzib yubordi. “Nabahor” jamoasini bugungi chiroyli o‘yin va g‘alaba bilan tabriklayman.
Qolgan o‘yinlarda ijobiy natija qayd etishga harakat qilamiz. Muxlislarimiz bizdan yaxshi natija kutishayotganini his etib turibmiz. Ularni stadionga qaytarishimiz kerak. Bugun Namanganga kelib bizni bevosita stadionda qo‘llab-quvvatlab turgan ishqibozlarimizga o‘z minnatdorchiligimni izhor etaman.
