O‘zbekiston futbol assosiasiyasi yurtimizda bolalar futbolini rivojlantirish maqsadida bir qator chora-tadbirlarni amalga oshirmoqda. O‘zbekiston futbol assosiasiyasi Milliy olimpiya qo‘mitasi hamda “Milliy tiklanish” demokratik partiyasi bilan hamkorlikda “Chig‘atoy” sport bazasining maydonlarida 2008-2009 yillarda tug‘ilgan bolalar o‘rtasida festival tashkil qilgani xaqida futbol ishqibozlariga ma’lumot berib o‘tgan edik.
Ushbu festivalni tashkil qilishdan assosiasiyaning asosiy maqsadi bolalar o‘rtasida futbolni rivojlantirish, sog‘lom turmush tarzini keng targ‘ib qilishdir.
“Chig‘atoy”, “Sergeli”, “Bunyodkor”, “Paxtakor”, “Odil Junior” hamda “Qorasaroy” jamoalari ishtirok etgan musobaqaning yopilish marosimi bo‘lib o‘tdi. Musobaqaning so‘nggi kunida ishtirokchilarga tashkilotchilar tomonidan esdalik sovg‘alari topshirildi.
Qayd etish zarurki, bunday tadbirlar yosh sportchilarga katta sportga o‘zlarining ilk qadamlarini qo‘yishlariga hamda bo‘lajak musobaqalarga tayyorlanishlariga katta yordam beradi. Bundan keyin ham shu kabi futbol bayramlarini muntazam uyushtirib borish rejalashtirilgan.
