Xalqaro futbol assosiasiyalari federasiyasi – FIFA Rossiyaning “Gazprom” kompaniyasi bilan hamkorlikda “Futbol do‘stlik uchun” ijtimoiy loyihasining 6-mavsumiga start berilgani va 9 iyun kuni Moskvadagi “Spartak” klubi akademiyasi maydonida mazkur loyihaning ochilish marosimi bo‘lib o‘tgani haqida xabar bergandik.

Bu yil “Futbol do‘stlik uchun” loyihasida dunyoning 211ta mamlakatidan tashrif buyurgan 1500 nafarga yaqin bolalar, milliy assosiasiya delegatlari va jurnalistlar ishtirok etishmoqda.

O‘zbekistondan mazkur loyihada yosh darvozabon Muslim Abdumannopov va yosh jurnalist Mardon Marupov ishtirok etyapti.

Bugun, 12 iyun kuni loyihaning futbol bo‘yicha asosiy musobaqalari start oldi. O‘zbekiston vakili Muslim Abdumannopov Kayman orollari, Isroil, Gibraltar, Mo‘g‘uliston va Lyuksemburg mamlakatlari a’zolari bilan birga Western Gorilla jamoasida ishtirok etdi.

Afsuski, ushbu jamoa a’zolari guruh bosqichidagi barcha uchrashuvlarda raqiblariga imkoniyatni boy berdi. Ammo loyihaan asosiy maqsad g‘alaba qozonish emas, tadbirlarda ishtirok etib, yangi do‘stlar orttirish, o‘zaro birdamlik aloqalarini o‘rnatishdan iborat.

Yosh jurnalist Mardon Marupov esa chet ellik yosh hamkasblari bilan media-markaz orqali bugungi tadbirlarni yoritib bordi.