Karlos Albert, Manuel Aguado Xil va Ektor Visentelarning Real Madrid Foundation Clinic dasturi bo‘yicha yurtimizga tashrifi doirasidagi birinchi bosqichning ikkinchi xaftasi ham o‘z nihoyasiga yetdi.
2004-2005 yilda tug‘ilgan bolalar ishtirokidagi “Bunyodkor” stadionida o‘tkazilgan mashg‘ulotlarda “Qirollik klubi” mutaxassislari “Real Madrid” akademiyasi metodikasi asosida mashg‘ulotlar olib borishgani xaqida avval xabar berib o‘tgan edik.
Birinchi bosqichning so‘nggi xaftasida ham amaliy darslarga alohida urg‘u berilib, asosiy e’tibor to‘pni maydonda olib yurish, to‘p bilan muomala qilish, maydonda to‘g‘ri pozisiya tanlay olish, yugurish texnikasi, standart vaziyatlardan unumli foydalanish, “tennisbol” mashg‘uloti kabi yo‘nalishlarga qaratildi.
Musobaqaning so‘nggi kunida “Real Madrid” murabbiylari shogirdlari hamda Azamat Abduraimov boshchiligidagi o‘smirlar terma jamoasi o‘rtasida nazorat uchrashuvi ham o‘tkazildi. Eslatib o‘tamiz 1 iyundan 16 iyunga qadar davom etgan mashg‘ulot va master klasslarda respublikamizning barcha xududlaridan tashrif buyurgan 150 dan ziyod yosh sportchilar ishtirok etishdi. Barcha qatnashchilarga sertifikatlar taqdim etildi.
Real Madrid Foundation Clinic dasturining keyingi bosqichi O‘zbekistonning boshqa shahar va viloyatlarida ham tashkil qilinishi rejalashtirilgan.