Jahon chempionatining "F" guruhidan o‘rin olgan 1-tur bahsi yakuniga yetdi. Shvesiya va Janubiy Koreya terma jamoalari o‘rtasidagi bahsda qit’adoshlarimiz mag‘lub bo‘lishdi.

Butun o‘yin davomida ustunlik yevropaliklar tomonida bo‘ldi. Birinchi bo‘limda shvedlar ko‘p imkoniyatlardan foydalana olishmadi. Ayniqsa, Berg 4-5 metr masofadan darvozani ishg‘ol eta olmadi. Koreyalik posbon ajoyib seyv namoyish qilib, zarbani qaytardi.

Ikkinchi bo‘limda Shvesiya terma jamoasi hisobni ochishga muvaffaq bo‘ldi. Salvadorlik hakam videotakrorga murojaat qilganidan keyin Janubiy Koreya darvozasi tomon penalti belgiladi. Shvesiyaliklar sardori Grankvist 11 metrli jarima zarbasidan samarali foydalanib, bahsning 65-daqiqasida jamoasini hisobda oldinga olib chiqdi.

Osiyoliklar qo‘shib berilgan daqiqalarda hisobni tenglashtirishlari mumkin edi. Ammo jamoa sardori Ki Song Yong qulay vazyaitdan bosh bilan aniq zarba bera olmagan bo‘lsa, keyingi vaziyatda to‘p shved futbolchisining qo‘liga tekkani uchun penalti belgilamadi.

Shu tariqa, Shvesiya terma jamoasi Meksika bilan birgalikda "F" guruhida peshqadamlik qiladigan bo‘ldi.

JCH-2018, "F" guruhi, 1-tur
Shvesiya – Janubiy Koreya  1:0 (0:0, 1:0)
Gol: 1:0 – 65, penalti Grankvist.
Shvesiya – Olsen, Yansson, Augustinsson, Lyustig, Grankvist, Klasson, Ekdal (Xilyemark, 71), Larsson (Svensson, 81), Forsberg, Berg, Toyvonen (Telin, 77).
Janubiy Koreya – Chjo Xen U, Kim Yon Gvon, Pak Chju Xo (Kim Min U, 28), Li Yen, Chjan Xen Su, Ki Son Yen, Ku Chja Chxol (Li Sin U, 72), Li Chje Son, Xvan Xi Chxan, Son Xin Min, Kim Sin Uk (CHjon U Yen, 66).
Ogohlantirishlar: Kim Sin Uk (12), Xvan Xi Chxan (55), Klasson (61).