Xabaringiz bor, so‘nggi paytlarda Milliy olimpiya qo‘mitasi sportni ommalashtirish, uni aholi orasida targ‘ib qilish yuzasidan bir qancha sport federasiyalari bilan birga turli tadbirlar tashkil etmoqda. Bu borada taekvondo WTF assosiasiyasi ham ancha faol. Bunga misol sifatida tashkilot tomonidan joylarda o‘tkazilayotgan tadbirlarni misol qilib keltirishimiz mumkin.

Jumladan, Bekobod shahridagi 7-internat-bog‘chada bolajonlar uchun ko‘rgazmali chiqishlar namoyish etib berildi. Yoshlar kuniga bag‘ishlangan tadbir Angren shahridagi "Fresh" majmuasida bo‘lib o‘tdi. Qashqadaryo va Qoraqalpog‘istonda o‘tkazilgan tadbirlar esa murabbiylar uchun seleksiya vazifasini bajardi. Unda iqtidorli bolalar saralab olindi. Dam olish kunlari esa Andijon shahridagi istirohat bog‘ida tashrif buyuruvchilar uchun master-klasslar o‘tkazildi.

Albatta, sportni ommalashtirish, uni rivojlantirish yo‘lida bu kabi tadbirlarning ahamiyati katta. Aynan shunday ko‘rgazmali chiqishlar, master-klasslar orqali yoshlar orasida sportga qiziqish uyg‘onadi. Bu esa o‘z navbatida bizga yangidan-yangi nomlarni taqdim etadi.