Bugun 11 iyul kuni “Chig‘atoy” sport bazasida O‘zbekiston futbol assosiasiyasining Hakamlar va nazoratchilar boshqarmasi tomonidan yig‘ilish o‘tkazildi.

Yig‘ilishda Professional futbol ligasi Bosh direktori Omon G‘ofurov, Hakamlar va nazoratchilar boshqarmasi boshlig‘i Ma’mur Saidqosimov, boshqarmaning boshqa mutasaddi xodimlari hamda Superliga va Pro-liga o‘yinlarini boshqarib kelayotgan hakamlar ishtirok etishdi. 

Xabaringiz bor, “Pepsi” superligasining “So‘g‘diyona” — “Metallurg” o‘yinida ishlagan Aziz Asimov hamda “Qo‘qon-1912” — “Lokomotiv” uchrashuvini boshqarib borgan Ilgiz Tantashevlar bellashuvlar natijasiga bevosita ta’sir ko‘rsatuvchi bir qancha xatolarga yo‘l qo‘ygan sabab Superliga hamda Pro-Liga o‘yinlaridan chetlashtirilgan edi.

Ushbu yig‘ilish davomida yuqorida nomlari qayd etilgan hakamlarning o‘yinlarda qilgan xatolari muhokama qilindi. Xususan Professional futbol ligasi Bosh direktori Omon G‘ofurov bu ikki hakamga qo‘llanilgan choralar qolgan hakamlar uchun dars bo‘lishi kerakligi, o‘yinlarni halol va sidqiqdildan boshqarish shart ekanligini aytib o‘tib, hakamlarga o‘z ustilarida ko‘proq ishlashni, o‘yindan o‘yinga yo‘l qo‘yilayotgan xatolarni kamaytirib borish shart ekanligini ta’kidlab o‘tdi.

Yig‘ilishda boshqa hakamlarning o‘yin davomidagi xatti-harakatlari ko‘rib chiqildi. Jumladan, “AGMK”-“Neftchi” o‘yinini boshqargan Temur To‘xtasinovning hakamlik ishi ham tanqidiy tahlil qilindi va uchrashuv davomida yo‘l qo‘ygan xatolari ko‘rsatib o‘tildi.