O‘zbekiston Milliy olimpiya qo‘mitasi xalqaro tashkilotlar bilan aloqalarni mustahkamlash, o‘zaro do‘stlik rishtalarini rivojlantirishni o‘z oldiga maqsad qilib qo‘ygan. Bu yo‘lda mamlakatimizdagi sport federasiyalariga ham o‘ziga yarasha topshiriqlar berilgan.

Shu munosabat bilan, bugun 12 iyul kuni O‘zbekiston karate Milliy Federasiyasi rahbariyati Butunjahon karate federasiyasi Prezidenti Antonio Espinoz va tashkilot Bosh kotibi Toshixasa Nagura bilan uchrashuv o‘tkazdi. Unda O‘zbekistondagi karate rivoji, sportning ushbu turini ommalashtirish borasida amalga oshirilayotgan ishlar haqida qizg‘in suhbat bo‘lib o‘tdi. O‘z navbatida, janob Espinoz O‘zbekistonda nafaqat karate, balki butun sport sohasida amalga oshirilayotgan islohotlarni kuzatib borayotganini ma’lum qildi.

Fursatdan foydalanib, O‘zbekiston karate Milliy federasiyasi raisi Nurxon Nafasov Antonio Espinozni mamlakatimizga taklif qildi. Bunga javoban Butunjahon karate federasiyasi rahbari Milliy olimpiya qo‘mitasi Prezidenti Umid Ahmadjonovga o‘z salomini yo‘lladi va yaqin kelajakda Toshkentga tashrif buyurib, O‘zbekistonda Markaziy Osiyo karate markazini ochish taklifini bildirdi.