Ўзбекистон Миллий олимпия қўмитаси халқаро ташкилотлар билан алоқаларни мустаҳкамлаш, ўзаро дўстлик ришталарини ривожлантиришни ўз олдига мақсад қилиб қўйган. Бу йўлда мамлакатимиздаги спорт федерацияларига ҳам ўзига яраша топшириқлар берилган.
Шу муносабат билан, бугун 12 июль куни Ўзбекистон каратэ Миллий Федерацияси раҳбарияти Бутунжаҳон каратэ федерацияси Президенти Антонио Эспиноз ва ташкилот Бош котиби Тошихаса Нагура билан учрашув ўтказди. Унда Ўзбекистондаги каратэ ривожи, спортнинг ушбу турини оммалаштириш борасида амалга оширилаётган ишлар ҳақида қизғин суҳбат бўлиб ўтди. Ўз навбатида, жаноб Эспиноз Ўзбекистонда нафақат каратэ, балки бутун спорт соҳасида амалга оширилаётган ислоҳотларни кузатиб бораётганини маълум қилди.
Фурсатдан фойдаланиб, Ўзбекистон каратэ Миллий федерацияси раиси Нурхон Нафасов Антонио Эспинозни мамлакатимизга таклиф қилди. Бунга жавобан Бутунжаҳон каратэ федерацияси раҳбари Миллий олимпия қўмитаси Президенти Умид Аҳмаджоновга ўз саломини йўллади ва яқин келажакда Тошкентга ташриф буюриб, Ўзбекистонда Марказий Осиё каратэ марказини очиш таклифини билдирди.
