O‘zbekistonda Olimpiya va Osiyo o‘yinlari kabi nufuzli musobaqalardagi muvaffaqiyatlar salmog‘ini oshirish borasida harakatlar jadal ravishda olib borilmoqda.
Bu borada navbatdagi qadam tashlandi desak mubolag‘a qilmagan bo‘lamiz. Bugun Milliy olimpiya qo‘mitasida boks, dzyudo, taekvondo WTF va karate WKF sport turlari bo‘yicha saralash musobaqalarini tashkil etish bo‘yicha yig‘ilish bo‘lib o‘tdi. Unda yuqorida qayd etilgan sport federasiyalari vakillari ham ishtirok etishdi.
Yig‘ilishda sharq yakkakurashlarining turli yo‘nalishi bilan shug‘ullanayotgan yoshlarimizni Olimpiya sport turlariga jalb qilish, ular uchun maxsus musobaqa o‘tkazish masalasi muhokama qilindi.
Unga ko‘ra kikboksing, muaytay, qo‘l jangi, ushu bilan shug‘ullanayotgan sportchilarimiz o‘rtasida boks bo‘yicha turnir tashkil qilish taklif etildi. Kurash, sambo, belbog‘li kurash, jiu-jitsudan dzyudoga, taekvondoning an’anaviy, shuningdek, ITF va GTF yo‘nalishlari, o‘zbek jang san’ati, jun ri dodan taekvondo WTFga, fudokan karate-do, an’anaviy karate va shotokan karate-dodan esa karatening WKF yo‘nalishiga yo‘naltirish ishlari olib boriladi.
15-21 yoshli sportchilar ishtirokida tashkil qilinadigan musobaqa joriy yilning sentyabr-oktyabr oylarida o‘tkazish rejalashtirildi.
