Indoneziya Shimoliy Koreya yetakchisi Kim Chen Inni shu yilning avgustida Jakarta shahrida bo‘lib o‘tadigan Osiyo o‘yinlari ochilish marosimiga taklif etdi.
Reuters xabariga ko‘ra, Janubiy Koreya rahbari Mun Chje In ham mazkur tadbirga taklif etilgan.
Aprel oyida ikkala koreys davlati Tashqi ishlar vazirlari avgust va sentyabrda o‘tkaziladigan Osiyo o‘yinlari ochilish marosimida yagona jamoa sifatida qatnashishga kelishib olishgandi.
Indoneziya Insoniyat taraqqiyoti va madaniyat ishlari vaziri Puan Maharani boshchiligida delegasiya shu hafta Shimoliy Koreyada bo‘lib, Xalq oliy majlisi raisi Kim Yong Nam bilan uchrashgan.
«Bu yerga kelishimizdan maqsad Shimoliy Koreya prezidentini 18 avgustdagi Osiyo o‘yinlari ochilish marosimida qatnashishlari uchun rasmiy taklif qilishdir», dedi vazir uchrashuvda.
Shuningdek, tashrif chog‘ida Shimoliy va Janubiy Koreya munosabatlari, hududiy muammolar, jangarilarga qarshi kurashda Indoneziya polisiyasining harakatlari o‘zaro muhokama qilindi. Delegasiya o‘tgan hafta xuddi shu taklif bilan Seulga borgandi. Prezident Mun taklifni mamnuniyat bilan qabul qilgan.
Eslatib o‘tamiz, ikki mamlakat Pyongchangdagi Olimpiya o‘yinlari ochilish va yopilish marosimlarida yagona bayroq ostida birlashgan edilar. Jakarta va Palembang shaharlari mezbonlik qiladigan Osiyo o‘yinlari ikki davlat hamkorligini yanada kuchaytirishiga umid qilishmoqda.
Avvalroq Osiyo o‘yinlarida uch sport turi bo‘yicha (basketbol, ajdaho qayig‘i poygasi va eshkak eshish) Koreya davlatlarining birlashgan jamoasi qatnashishi xabar qilingandi.
